馬體會1.9倍W趁祖捧

猪拉多纳

文迪蘇傑 施蒙尼回歸蟲變龍

今晚歐聯A組賽事會上演重量級大戰，由上季西甲盟主馬體會，主場迎戰意甲冠軍祖雲達斯。祖記喺國內係威係勢，但嚟到歐聯就硬係差啲，加上去親西班牙比賽都冇咩好結果，今次撞正有將帥回歸嘅馬體會實在冇乜搶分本錢，1.9倍主勝有計。

（有線18及中央5台周四凌晨2:45直播）

馬體會喺首戰作客以2:3敗走奧林比亞高斯，今仗回師主場肯定打醒十二分精神，免得再失分令出線形勢陷於被動。事實上「床單軍團」喺歐洲賽主場表現出色，近19次出擊贏17場，證明佢哋嘅主場威力真係唔講得笑。
歐洲賽主場19戰17勝

與此同時，馬體會陣營亦傳出好消息，射手文迪蘇傑經已歸隊今晚料擔正攻堅。呢位克羅地亞新兵無論喺前線衝鋒陷陣，抑或協防緊迫都有貨交，喺佢掩護之下，相信中場佐治高基、阿達杜倫將得到更多機會。更重要嘅係主帥施蒙尼亦坐完波監可以喺場邊督師，上仗佢哋一回歸，馬體會就喺聯賽主場4:0大炒西維爾，今戰有望乘勇再贏一仗。
祖記「西征」被恰慣

對手祖雲達斯近年雖然橫行意甲，不過嚟到歐聯始終唔夠Sharp，上屆歐聯就喺分組賽出局。而且「斑馬兵團」近20次作客西班牙球隊輸14次，格食格味濃。咪忘記祖記教練阿里基領軍碰西班牙球隊都畀人恰慣，近12次喺歐聯征西只贏得1次，上屆率AC喺16強作客馬體會亦慘敗1:4收場。況且祖記中場大腦派路有傷在身，就算佢紮住上勉強落場，對住馬體會嘅瘋狂壓迫都好難踢出水準，祖記造訪卡達朗球場唔似有運行囉！
盤路解碼

馬體會上季主場取得23勝6和1負成績，贏波率達77 %。
Data King：馬體會專恰意甲球隊

‧馬體會近9次主場鬥意大利球隊，取得6勝3負成績。

‧「床單軍團」喺上屆歐聯主場取得5勝1和成績。

‧祖雲達斯20次作客西班牙球隊，合共取得3勝4和14負。
乜都玩錦囊：雙方射手「大」鬥法

馬德會射手文迪蘇傑已復出，經過上仗聯賽磨練後狀態肯定有所提升，加上今季主場4戰都可以喺返更衣室前領先對手，相信今仗都會一開波就搶攻。對手「斑馬軍團」箭頭泰維斯同樣Fit到爆，開季至今已轟入6球。既然雙方火力十足，不妨追埋2.35倍入球大。