日本北韓爭金牌細均力敵

猪拉多纳

上屆女亞足決賽翻版！

亞運女足今日煞科，北韓、日本將會爭奪金牌，由於兩隊近年都冇乜交手，佔「主場」之利嘅北韓，坐和望贏，1.52倍入球細可以話係投X必然選擇。

（有線61、201周三晚7:00直播）

北韓、日本都係女足今屆不敗之師，前者4戰全勝入13球失1球，後者就4勝1和淨入27球，大家稱得上係勢均力敵。但係北韓相對晉級過程比較難打，8強1:0贏中國，4強2:1力挫南韓都要花唔少氣力，反而日本除咗小組賽和中國0:0屬硬仗，基本上玩玩吓咁就入咗決賽，話就話體力消耗冇咁大，不過對隊型、戰術磨練一定唔及北韓咁有效果，何況計往績日本仲係5勝5和9負居下風添。
日本晉級體力消耗少

其實北韓女足向來以體能勁著稱，南韓妹前晚輸畀佢哋之後，當地媒體直情話以北韓11個球員嘅戰鬥力，南韓女足要打多過11個人至掂，對方簡直同男子足球無異，90分鐘落嚟一啲都唔攰，單係呢一點日本已經處於下風。更重要嘅係，南韓近期反日情緒又升溫，南韓男足贏日本1:0場波，有韓迷响看台掛咗幅民族英雄安重根嘅大海報，呢位仁兄1909年喺哈爾濱成功暗殺前日本首相伊藤博文，韓人當佢係抗日象徵，呢單嘢激到日本代表團要去信組委會抗議，只不過南韓Fans會賣帳咩？恐怕未必，日本今日同打作客波冇乜分別。
北韓體能同男足無異

當然，日本喺戰術修養方面，可能比北韓要細膩啲，但係過去兩屆亞運雙方各贏一次，06年多哈北韓靠12碼勝出，10年廣州日本險勝1:0，反映兩隊實力相近，正因為係均勢波，北韓等於主場出擊，點都着數過「紅粉兵團」，今場第101次帶隊出戰嘅日本監督佐佐木則夫，好大機會掃興而回，得個銀牌到手。
「靈感女神」莎拉提醒你

日本上屆決賽1:0擊敗北韓。