關鍵一戰蘇黎世同加柏駁火

猪拉多纳

A組瑞士超蘇黎世主場對德甲慕遜加柏，兩軍喺各自聯賽都排第二位，只分別落後於兩國班霸巴素利同拜仁慕尼黑，成績都比預期好，不過歐霸盃首戰賽果都未盡如人意，今晚兩軍對撼，為爭出線雙方以三分為目標，蘇黎世踢法有前冇後，啱晒快得交關喺慕遜加柏打反擊，今場入波唔會少，1.8倍入球大值得捧場。

（周五凌晨3時05分開賽）

上季喺瑞士超四甲不入嘅蘇黎世，今季強勢反彈，一度佔據榜首位置，源於佢哋肯冒險踢進攻足球，較早前聯賽大炒錫永4比1，水銀瀉地攻勢贏得一致掌聲，可惜歐霸盃出師不利，作客同弱旅塞浦路斯阿波利華利馬素鬥攻，完場前輸個烏龍波慘負2比3，出師不利之後今仗主場鬥慕遜加柏變得十分關鍵，皆因未來兩場歐霸盃都要硬撼西班牙勁旅維拉利爾，如果今仗主場都攞唔晒3分，出線形勢將會十分渺茫，教練美亞喺上周末聯賽作客年青人作出輪換，擺明留力今晚同慕遜加柏駁火。
慕遜加柏反擊煞食

慕遜加柏近期喺德甲兩連勝，氣勢如虹，佢哋首戰主場圍攻維拉利爾，半場已取得領先優勢，但畀全場上陣只有幾分鐘嘅尼日利亞翼鋒烏捷射入扳平（佢入波後即受傷離場），今晚雖然作客，但目標一樣係3分，慕遜加柏勝在中前場球員速度極高，面對主攻嘅蘇黎世啱晒佢哋打反擊，入球騷可期。