紅軍攻守皆弱搞唔掂西布朗

猪拉多纳

利物物上季咁Sharp醒，好大程度上係依賴蘇亞雷斯同史杜列治呢對孖寶嘅發揮。依家前者走人後者仲傷緊，紅軍即刻沉淪連續4場贏唔到，今晚佢哋主場迎擊回勇嘅西布朗，唔似讓得起對手，2.88倍「讓客」諗得過。

（now621台周六晚10:00直播）
西布朗大勇3連勝

利物浦上季勇得當頭，就算後防唔掂，前面幫你入夠補數，依家兩大射手一走一傷即令隊波火力大減。雖然有傳史杜列治傷勢好轉，但佢早前稱傷落選國家隊大軍，今晚如果擔正實引嚟唔少閒言閒語，相信領隊羅渣士都唔想為球隊添亂，繼續沿用「腦殘」巴洛迪利攻堅。不過呢位前鋒加盟以嚟交到幾多貨大家心照，年紀愈嚟愈大嘅謝拉特又隨時因周中歐聯賽事回唔得切氣，得番史達寧一個單打獨鬥好難佔到甜頭啫！

對手西布朗經過季初磨合後，表現明顯好轉，上仗更大炒般尼4:0勇奪3連勝，士氣信心都處於高峰，的確有一拚之力。加上射手比拉希奴腳風順，近2仗入3球，足夠搞到今季未有任何改善、連續6場失波嘅紅軍防線風聲鶴唳，計落紅軍真係未必食硬對手囉。