馬體會征蝙蝠洞 讓波靠唔住

猪拉多纳

今晚「蝙蝠兵團」華倫西亞會喺西甲主場恭候上季盟主馬德里體育會，兩軍經過6輪比賽，同得14分位列聯賽2、3位，今輪碰頭激戰在所難免。其中華倫前線攻擊點夠多，季初成功展示出唔錯嘅入球能力，可以話係現時排喺聯賽榜前列嘅主因，客軍馬體會周中歐聯大戰祖雲達斯，體力輸蝕仲要讓波，今晚梗係支持以逸待勞嘅華倫西亞1.46倍「讓主」。

（now632及TVB13周六晚10:00直播）

緊隨巴塞之後暫列西甲次席嘅華倫，中前場人腳夠晒活力，幾件主力好似柏利祖、菲侯利、皮亞堤等同屬25歲當打之齡，6場斬獲4球嘅首席射手柏高艾卡沙更只得21歲，嚟緊肯定大把世界！
華倫地頭3連勝 場場省3粒

雖然佢哋上輪作客被皇家蘇斯達逼和1:1，但「蝙蝠兵團」一向靠主場搵食，今季主場出戰3戰3勝，當中每場都攻入對手3球，今晚喺地頭擺陣，對住上季盟主嘅馬體會都未驚過。

馬體會貴為上季西甲盟主，今季唔使問阿貴都一定想衞冕，但正所謂「創業難、守業更難」，成為咗圍攻目標之後，西甲隊隊對住馬體會都出盡九牛二虎之力，搞到佢哋4場聯賽勝仗，其中3場都係煲魚生粥。更何況馬體會幾日前至喺歐聯激戰完勁旅祖雲達斯，教頭施蒙尼點樣輪換實屬疑問。今晚造訪出晒名嘅「地獄蝙蝠洞」，張峰相信近況唔錯嘅華倫，喺主場至少唔使輸，受讓值得捧場。
馬體會作客半場未嘗領先

雙方喺西甲開季至今仲未輸過。

華倫西亞聯賽主場3戰只失1球。

馬體會今季作客半場從未領先。