曼聯愛華頓博大霧

猪拉多纳

後防殘鬥殘以攻代守

經過咗頭6場英超「易食」賽事後，「紅魔鬼」曼聯嘅成績為勝和負各2，做緊「七仔」，今晚就開始「小魔鬼賽程」，先喺主場對愛華頓，作客完西布朗後，再喺奧脫福迎戰車路士同曼城，4場硬嘢唔再係「依絲執」！曼聯傷停嚴重，隊長朗尼今場冇得倒戈「拖肥糖」，後防更係傷兵成籮，防守弱到喊，今場大盤有買趁早！

（now 621周日晚7時直播）

曼聯今季唔使踢歐洲賽，球員多咗休息時間，理應減少受傷機會，但黑起上嚟就咩衰嘢都會發生，中堅輪住傷，菲爾鍾斯、莊尼伊雲斯同基斯史摩寧全部打柴，跟住去到中場，兩位攻守兼備嘅中場主力朗尼同安達靴里拉分別因停賽同肋骨骨折而缺陣，後防已經勁不穩，依家連中場防守都冇埋，戴利白蘭特又唔係馬斯真蘭奴嗰種一個殺晒嘅防中，唔通真係好似尹戈爾所講，防守由前鋒開始咩？
「拖肥」踢完歐霸未回氣

愛華頓上場英超對利物浦奇迹逼和1比1，咪以為「拖肥糖」失咗1球，防守就好勁，如果唔係「紅軍」班攻擊球員係咁浪費餐士，「拖肥糖」根本冇可能拎到1分落袋，班後防依然係甩漏多多。再加上愛華頓啱啱周中踢完歐霸盃，領隊馬天尼斯中前場都有作出輪換，派咗部分副選上陣，唯一不變係條4人防線，今晚佢哋隨時腳仔軟，守唔到曼聯嗰條星級攻擊線，就咁一個迪馬利亞都夠玩死佢哋呀，都未計尹佩斯同法卡奧，今場一於捧入球大啦﹗