五條煙齊上皇馬-2咬包

猪拉多纳

兩支有份出戰歐聯嘅西甲代表今晚壓軸登場，皇家馬德里主場撲擊畢爾包。皇馬淨計個人質素已經贏足對手九條街，加上畢爾包板櫈深度不足，今季兼顧兩條戰線已疲態畢露，皇馬主場出擊有力大炒對手，讓球主客和皇讓二球照捧讓球主勝。

（now 632周一凌晨3時直播）

皇馬上場歐聯作客保加利亞盧多格德斯險勝2比1，「同花順 」陣容只有基斯坦奴朗拿度和加里夫巴利打正選，另外中堅比比、右閘丹尼爾卡華積亦退居後備，直至久攻不下才換入卻奧斯、賓施馬及占士洛迪古斯搏殺，最初確有點輕視對手。皇馬今季已經先後輸過畀皇家蘇斯達及馬德里體育會，現落後巴塞隆拿4分，皇馬月底便會於班拿貝主場迎戰巴塞進行國家打吡，現階段當然唔想再失分被拉開差距，雖然C朗上場賽後據報有微傷，但應無大礙可披甲，預計「五條煙」會悉數復任正選強攻對手。
畢爾包兼顧歐聯散晒

近年西甲「四哥」因為板櫈深度唔夠，經常出現「兩頭唔到岸」情況，好似維拉利爾、皇家蘇斯達、馬略卡都試過因要兼顧歐聯，而搞到聯賽成績一落千丈，畢爾包今季好大機會成為另一受害者。自從佢哋首輪聯賽擊敗利雲特之後，對上4輪聯賽未嘗1勝，再加上剛喺歐聯輸畀白俄羅斯球隊巴迪，士氣、信心更進一步受挫，作客皇馬注定冇運行。