法哥阿韋着火 車廠射手大交鋒

猪拉多纳

英超踢到第6輪賽事，依家只係剩番兩隊保持不敗，就係今晚對壘嘅車路士同阿仙奴。車路士今季引入西班牙孖寶「法」、「哥」後，鋒力大幅提升，阿仙奴亦有「阿」、「韋」孭飛，今季收購嘅阿歷斯山齊士同韋碧克亦「士哥」停不了。今晚車路士喺史丹福橋球場擺陣，預料兩隊射手將合演入球騷，捧1.72倍入球大最好不過啦！

（今晚9:05 now621直播）
車路士6場勁入19球

自法比加斯同迪亞高哥斯達加盟後，成隊車仔改頭換臉，表現相當Sharp醒！「法」、「哥」兩個仲鬼死咁合拍，帶領車仔開咧至今6戰拎到5勝1和不敗佳績，合共攻入19球係英超入波最多球隊。迪亞高哥斯達今季已為車仔射入8個士哥，法比加斯亦時時交出靚助攻，今晚倒戈肯定唔會留情。
阿仙奴雙箭士哥多

作客嘅阿仙奴最近傷兵滿營，艾朗藍斯、阿迪達都加入十字軍團，但班波嘅表現似乎冇太大影響，尤其英格蘭前鋒韋碧克大發神威，啱啱喺歐聯分組賽4:1大勝加拉塔沙雷，佢就大演帽子戲法。至於阿歷斯山齊士近6次踢正選亦有5場有波入，配合埋翻生嘅奧斯爾，絕對有能力撕破車仔防線。

車路士今場有防守中場拉美利斯受傷缺陣，阿仙奴亦有右閘迪保治、防中阿迪達同戴亞比養傷，雙方防守能力都打折扣。既然兩隊前鋒呢排腳風咁順，今晚隨時又炮製唔少士哥，梗係棒入球大啦！
盤路解碼

車路士上季英超主場19戰，13場開出入球大，比率達68%。
Data King：寸王鬥廠11戰不敗

‧車路士連續5場主場鬥阿仙奴，至少攻入對手2粒。

‧車仔連續6次對阿仙奴未輸過。

‧莫連奴11次鬥阿仙奴，取得6勝5和不敗成績。
乜都玩錦囊：車仔開局順撐上盤

車路士開局順利，至今9仗都未輸過，射手迪亞高哥斯達同中場法比加斯更加弗到爆。相反兵工廠傷兵滿營，中場艾朗藍斯、守將迪保治等幾件主力打柴，加上佢哋向來畀「寸王」食住，上季仲喺史丹福橋慘吞6蛋。今次藍戰士讓半一，撐1.84倍上盤。