奧連特教頭劈炮即散 杜根咸+1過關膽

猪拉多纳

今日淨係得英錦賽玩，見到咁多低組別球隊對壘，係咪頭都大埋，唔知揀邊場好？就等阿king同大家推介其中三場玩吓過關啦，搵杜根咸主場對奧連特做過關膽。正所謂蛇無頭不行，自從奧連特主帥羅素沙拉迪辭職密謀過檔卡迪夫城後，球隊即刻錄得三連敗，認真濕滯，即使對手杜根咸只係乙組仔，奧連特今場作客睇怕都讓唔起對手，讓球主勝值捧。

（周三凌晨2時30分開賽）

唔好睇奧連特依家排喺英甲下游，其實呢隊波實力唔曳，再加上前任領隊羅素沙拉迪有料到，奧連特上季英甲係排名第三，可惜喺升班附加賽不敵洛達咸。正所謂有麝自然香，早排炒咗領隊嘅卡迪夫城有意搵羅素沙拉迪接手，而沙拉迪更喺上月尾辭去奧連特領隊一職，鋪定路執教「卡城」。慘情嘅奧連特冇咗主帥，上季兩大神射手戴夫穆尼同列斯比今季又老態畢露，球隊一時之間冇咗多位重量級人馬，陷入低潮無可厚非。英乙嘅杜根咸近四次主場對住奧連特都能保持不敗，讓球主勝唔怕追！
米爾頓凱恩斯撻着吼大

另外阿king再推介米爾頓凱恩斯主場迎戰AFC溫布頓，米爾頓凱恩斯曾喺英聯盃大炒曼聯四蛋而聲名大噪，呢隊波攻力強橫，前鋒基歷治、阿科比、丹尼爾包維輪住發威，今場有望再演入球騷，大盤咪走寶。最後嚟多場乙組仔大戰，樸茨茅夫主場對諾咸頓，睇番兩隊近況以及對賽往績均旺細盤，入球細捧得過。