狂牛伐力搵唔到食

猪拉多纳

「迪哥」例死火 西班牙強細不再

西班牙射手迪亞高哥斯達中咗「叛國咒」，注定國際賽冇運行？呢位26歲射手喺西甲同英超也文也武，但轉戰國際賽就死晒火，代表巴西同西班牙，總共7次上陣都冇波入。今晚歐國盃外圍賽C組，「鬥牛士」作客鬥斯洛伐克，當全世界準備睇呢位車路士前鋒數胡，佢隨時會嚟個反高潮。加上「鬥牛國」霸氣不復當年，要咬入對手有難度，客W回報低，寧揀入球細。

（有線64及203台周五凌晨2時45分直播）
鬥牛勇士鬥心減弱

迪亞高哥斯今季英超7戰轟入9球，認真犀利。不過，好多頂級射手喺球會賽事威風八面，但唔知點解一去到國際賽舞台，腳風往往會好唔順，好似美斯就係最佳例子，而「迪哥」更加離譜，佢兩次為出生地巴西披甲食白果都算數，入籍西班牙後，擁有大批擅長助攻隊友支援下，竟然5次上陣都入唔到波，似乎同「鬥牛國」格格不入。事實上，西班牙近年慣用巴塞「無鋒陣」踢法，令屬於正中鋒嘅迪亞高哥斯達難以發揮最強威力，亦係佢未能打破入球荒嘅原因，今仗切勿對「迪哥」抱太大期望。

另外，西班牙喺今屆世盃衰到貼地，明顯已由高峰滑落，好大程度上因為恩尼斯達、法比加斯、大衞施華等骨幹人物已贏盡各國際大賽，鬥心減弱，整體活力及進攻銳利大打折扣。上仗炒到馬其頓，只因對手太弱，今仗作客實力唔曳嘅斯洛伐克，肯定冇咁易踢。
斯洛伐克穩守求和

斯洛伐克中後場人腳唔曳，擁有拿玻里中場咸錫、利物浦中堅史卡迪爾，仲有唔少球員喺德甲及意甲搵食。球隊踢法硬淨，防守穩健，近7場比賽只失兩球；只係鋒線較弱，施斯達克、阿當尼米錫只係德乙貨色，估計難對西班牙防線構成太大威脅。斯洛伐克首輪分組賽小勝烏克蘭1比0，今仗面對豪門西班牙，既然自知冇本錢鬥攻，應會先做好防務，以攞1分為首要目標，因此今仗擺明唔會多波入，玩細好正路。