狂牛唔齊腳攻細難求

猪拉多纳

西班牙經過世界盃恥辱性出局後，9月嘅歐國盃外圍賽大炒馬其頓總算出番口氣。今晚佢哋會喺外圍賽作客斯洛伐克，到時就證明到係咪真係「狂牛不死」。斯洛伐克雖然實力、名氣唔及「狂牛兵團」，但係佢哋勝在防守出色。今場勢成「矛盾大對決」，與其估賽果，不如玩1.85倍嘅「入球細」好過！(有線64、203及廣東體育周五凌晨2:45直播)
西班牙踏入重建期

「狂牛兵團」喺世界盃分組賽就出咗局，表現肉酸到震，完全冇晒霸氣。雖然佢哋上一輪大炒馬其頓5:1，不過對手實力咁曳，老實講證明唔到啲咩。究竟「狂牛兵團」嗰套Tiki-taka足球哲學係咪已經過時？入選嘅頂級前鋒只得迪亞高哥斯達，中場冇咗沙維同沙比阿朗素之後，法比加斯、佐治高基呢對新中場組合Work唔Work，呢啲問題好有可能喺今輪對斯洛伐克睇到答案。

斯洛伐克稱得上球星嘅，雖然只有効力拿玻里嘅中場咸錫同利物浦中堅史卡迪爾，但係佢哋上一輪作客烏克蘭全取3分，足證唔係流料。斯洛伐克今年喺國際賽5場波4勝1負，防線只係失2球，西班牙要拆散佢哋條防線都唔係咁易。