巴西阿根廷大騷動

猪拉多纳

鳥巢夜演霧霾版「美洲超級經典打吡」

北京鳥巢今晚上演「美洲超級經典打吡」，巴西大戰阿根廷！兩大冤家每次交鋒必定擦出火花。「森巴兵團」尼馬青出於藍，今季西甲入波多過巴塞隊友美斯，趁今仗同「師兄」對決，證明自己可成球壇一哥。美斯喺阿根廷勝在有阿古路、迪馬利亞幫手，足以撕開巴西三流防線。今場係雙方百年對戰史上第100次交鋒，雙方更渴望贏得呢場別具意義嘅比賽，勢必鬥攻搏槌，直取入球大。

（TVB 302周六晚8時05分直播）
尼馬美斯爭新球王

今場國際熱身賽大有名堂，叫做「美洲超級經典打吡」，喺2011年創辦，由巴西同阿根廷私鬥。巴西包辦11及12年冠軍，去年就未有舉行，今次移師中國北京對決。兩支死敵相隔兩年再交鋒，戰意肯定旺盛，尤其係雙方同樣於世盃後換帥，呢場大戰屬於真正考驗，絕對唔衰得。巴西領隊鄧加最大殺着當然係尼馬，佢喺今季西甲已轟入7球，仲多過「大佬」美斯，可謂大熟大勇。

尼馬加盟巴塞以來，一直被視為美斯「副車」，但邊有球星會願意一世屈居別人之下。尼馬如果想成為「新球王」，起碼先要贏美斯，今次各為其主正面決鬥，佢肯定使出渾身解數入波，為「森巴足球」世盃慘敗後，重振聲威。不過，巴西今仗有中堅堤亞哥施華缺陣，大衞雷斯輕出唔可靠，預料防線抵擋唔住阿根廷衝擊。
百年恩怨百度交鋒

阿根廷由前巴塞主帥馬天奴接手後，演出亦有交代，上月熱身賽以4比2擊敗德國，報番世盃決賽一敗之仇。該仗美斯缺陣之下，單係迪馬亞利一個已翻轉德國後防，呢位翼鋒能傳擅射，加盟曼聯後有神級表現，大家有目共睹，今仗同美斯聯袂出擊，加埋阿古路，火力非常猛。

雙方自1914年首次比賽後，經歷100年雙方共交鋒99次，巴西贏咗39場，阿根廷勝出36場，另24場打和。今仗係雙方百年恩怨的第100次對決，令勝負意義大，兩支世仇有你冇我，肯定喪攻求勝，大盤可期。