德國贏波唔客氣

猪拉多纳

勝在人腳豐富！

今屆歐洲國家盃外圍賽多數都係強弱分明，例如D組，世界盃冠軍德國隊肯定係出線頂頭大熱，今晚作客波蘭呢場，可能已經係佢哋成個外圍賽最惡啃嗰場波。「日耳曼軍團」依家雖然成班傷兵，不過領隊勒夫手上仍然有大把星級球員可以用，一班德甲精兵要綁實佢哋見慣見熟嘅「波蘭王子」羅拔利雲度夫斯基，No Problem啦，1.44倍客勝值得捧場！

（有線61、201及中央5台周日凌晨2:45直播）
德國新兵爭表現

德國近年步入收成期，一班球星連世界盃都攞埋之後，士氣同信心都係前所未有咁高漲。有前輩話：球場上面「勝利會變成一種習慣」，湯馬士梅拿、紐亞、馬里奧葛斯、卻奧斯等人走埋一齊，自不然就會產生爭勝嘅鬥心，今場要揮低實力次一級嘅波蘭絕對OK吖！

雖然奧斯爾、舒韋恩史迪加、馬高列奧斯同基迪拉等主力因傷缺陣，不過勒夫今次已經重召慕遜加柏前鋒麥斯古斯，又畀季初喺利華古遜表現突出嘅比拿拉比第一次入選，德國新人輩出，個個都要為正選努力，放軟手腳機會好微喇！
波蘭單靠羅拔仔攻堅

波蘭喺首場分組賽大炒直布羅陀7球，不過對手實在太弱，呢場大勝根本唔足以證明波蘭嘅實力。事實上，波蘭前線基本上打一個羅拔利雲度夫斯基，由於「羅拔仔」喺德甲打滾多年，以多蒙特同拜仁慕尼黑球員為主嘅德國防線對佢已經熟晒路，尤其係多蒙特舊隊友曉姆斯嘅傷已經好番，德國防線由佢擔大旗，睇嚟波蘭都幾難惡得出樣。

頂占筍盤：德國（客勝）