ＦＣ達拉斯大起銀河

猪拉多纳

今晚雖繼續有歐國盃外圍賽賽事舉行，但阿King睇中咗場美職賽事，由FC達拉斯主場對洛杉磯銀河。銀河現時喺美職同西雅圖海灣者同得60分但少踢1場，今仗只要唔輸波就可以獨佔榜首位置，但球隊有主力射手羅比堅尼要踢國際賽無法上陣，造訪主場3連勝嘅FC達拉斯屬可勝不穩格，阿King寧捧入球大。

（TVB301周一早上7時直播）

由於海灣者昨晨輸波，所以銀河聽朝作客FC達拉斯只要唔輸波就可以壓過海灣者獨佔榜首。不過，銀河近期「着火」嘅主力射手羅比堅尼因要代表愛爾蘭國家隊踢歐國盃外圍賽而無法上陣。另一射手當路雲剛為美國國家隊踢完熱身賽，只有不足48小時備戰今仗，球隊攻力無可避免受到影響，就算球員矢志爭奪常規賽冠軍，今仗亦未必可輕易擊敗FC達拉斯。

FC達拉斯近期表現反覆，但可以留意球隊主場其實已錄得3連勝，只係客場表現差先令人感到隊波近況一般。FC達拉斯雖有門將魯爾費南迪斯及前鋒巴拉斯佩雷斯要為國家隊服役而缺陣，但仍有前鋒安祖斯艾斯哥巴及泰斯拿在陣，球隊攻力有保證下面對矢志爭標而一定主動搶攻嘅銀河，阿King相信今仗會上演入球騷，捧入球大。
巴拉福特唔赦班士利

另一場美職賽事，侯斯頓戴拿模今仗如不敵已鎖定季後賽參賽資格嘅華盛頓聯隊，就有可能緣盡季後賽，球隊一定全力搶攻爭勝。不過，華盛頓聯隊要力保東岸榜首位置亦需全力作戰，兩軍各不相讓梗係捧入球大。而英甲班士利狀態麻麻，主場都兩連敗，面對回勇嘅巴拉福特冇明顯優勢，加上雙方近八次交手有六次打和可謂勢均力敵，有得受讓嘅巴拉福特較可取。

（TVB301周日晚上10時直播）