撐比利時報仇贏「波」

猪拉多纳

今晚繼續係歐洲國家盃外圍賽天下，其中B組由仲未開齋嘅波斯尼亞主場鬥比利時。波斯尼亞狀態麻麻兼唔齊腳，睇怕都頂唔到上場半力出擊依然輕鬆炒安道爾6蛋、今場矢志報仇嘅比利時，就算主隊受讓平半都信唔過，撐比利時1.88倍上盤。

（有線64、203周二凌晨2:45直播）

波斯尼亞今夏首次殺入世盃決賽周，即使分組賽畢業都算創咗歷史。正當球迷期望佢哋喺歐國盃外圍賽再接再厲之際，呢支東歐國家隊首戰竟然落筆打三更，主場1:2輸畀「魚腩」塞浦路斯，上仗作客威爾斯又悶和0:0，今晚出戰同組最強嘅比利時，主場壓力隨時令佢哋再次失準。
波斯尼亞唔齊腳

不過咁都未算大鑊，更頭痛係波斯尼亞今場有射手迪斯高停賽，加埋中場沙利荷域、畢卡錫、守將哥拉辛拿斯打柴三線都唔齊腳，想喺養精蓄銳嘅比利時身上搶分睇怕唔容易。

翻查往績，比利時近3次對住波斯尼亞都輸，今場絕對係打落水狗報仇嘅黃金機會。主帥韋莫斯喺上場大炒安道爾之戰，安排前鋒盧卡古、中場費蘭尼、迪比利坐後備，擺明要佢哋留力今仗，而且車路士門將泰拔高圖爾斯亦已經傷愈可以把守最後一關，計邊瓣都贏晒波斯尼亞啦！

歐國盃B組