百利先生值得期待

不死鸟

同「嘉嘉掂」比較，今日要介紹另一新西蘭自購馬K271，級數、評分高一等，顯然值得令人期待。這匹「極品絲綢」同主新貨，於周歲拍賣會由澳洲盃王甘明斯投得，之後轉由Ngapuke賽馬公司擁有，留在新西蘭受訓，兩歲時試過2次閘分獲冠季，踏入3歲才正式上陣，一出跑1200米處女馬賽被捧成1.9倍大熱門，但6駒競逐只梗頸第四，打後3場越級挑戰高獎金賽事，包括一場表列賽力拼僅敗，以及新西蘭二千堅尼一級賽後上第四，同樣輸畀星級對手Tell A Tale，紙上賽績縱仍是處女馬身份，不過睇番4場出賽片，經常漏閘跑落又兩頭片，重覆犯錯下表現都咁有殺傷力，我覺得「百利先生」?能力，比起06年新西蘭二千堅尼第五名「愛馬寶」有過之而無不及。
血統方面，父系Tale Of The Cat響澳紐種馬行列都算幾有地位，不時有子嗣贏黑字賽，在港同父馬各有成就，如「連利精英」去季3捷，「精彩」煞科日贏二班，4歲便進入飛躍期；其母6勝1600至2200米，包括三級賽，戰鬥力亦不凡，有理由相信「百利先生」評到87分仍有不少上調空間，一於吼到實。