葡國U21主場威多鋪

猪拉多纳

葡萄牙大國腳於歐國盃外圍賽出征丹麥，小國腳則於U21歐國盃附加賽次回合迎戰荷蘭U21，角逐明夏於捷克舉行嘅決賽周入場券。葡萄牙今屆於外圍賽九戰全勝，包括上周首回合作客荷蘭先勝2比0，實力明顯大超班，今次有主場之利仍可睇高一線，主W可捧。

（有線155台周三凌晨零時直播）

U21歐國盃決賽周明年六月於捷克舉行，連主辦國捷克在內共八隊參加。五十二支球隊於外圍賽先分十組角逐，每組首名及四支最佳成績第二名共十四隊進身附加賽，然後透過主客兩回合去決定七個決賽周席位。葡萄牙係今屆分組賽唯一一支全勝球隊，面對以色列、挪威、阿塞拜疆及馬其頓豪取八連勝，然後上周中舉行嘅附加賽首回合，憑沙治奧奧利華拉及卡度素文尼各建一功，以2比0擊敗荷蘭取得大好優勢，只要今場唔輸、甚至小負一粒都可進身決賽周。
荷蘭小將欠實戰冇態

今次葡萄牙大軍名單共五名球員來自國內勁旅士砵亭，其中上場入波功臣卡度素文尼、中場祖奧馬里奧、後衞保羅奧利華拉、列卡度艾斯基奧都係常規正選，夾慣夾熟係佢哋取得好成績嘅最大關鍵。荷蘭陣中雖有唔少響噹噹名字，但除咗川迪前鋒卡斯泰亞奴斯演出較佳，其餘燕豪芬中場阿當馬希、車路士後衞尼敦阿基於所屬球會今季都冇乜上陣機會，狀態靠唔住，葡萄牙有力再下一城。