飛腳齊章主場等滅鼠

猪拉多纳

日本天皇盃今演三場8強賽，其中近期氣勢如虹嘅大阪飛腳主場迎戰大宮松鼠。大宮松鼠現排日職尾四心繫護級，加上主力射手隆比真歷需要應付國際賽無緣上陣，作客難敵夫添出戰嘅大阪飛腳，讓球主勝可作過關重心。

（周三晚6時開賽）

大阪飛腳上周末在日聯盃4強次回合不敵川崎前鋒，八連勝走勢終止，但其實佢哋當時首回合有兩球領先優勢，一時放軟手腳不足為奇。大宮松鼠近五場聯賽贏四場，狀態甚勇，亦因為連場搶分成功，令佢哋喺聯賽榜升上尾四，暫時比尾二嘅大阪櫻花多兩分，為護級盃賽未必會上心。陣中主力前鋒隆比真歷因入選斯洛文尼亞國家隊而無法披甲，戰鬥力打折扣，相反大阪飛腳前鋒宇佐美貴史及中場大腦遠藤保仁俱未獲國家隊徵召，可以落場搏殺，有力贏波晉級。
基羅納硬淨唔怕華拉度列

另外兩場比賽，西班牙盃華拉度列主場迎戰基羅納，基羅納現排西乙榜首，今季作客聯賽更未嘗一敗，作客唔怕華拉度列，揀讓球客勝。最後巴西盃八強次回合，明尼路主場鬥哥連泰斯，明尼路首回合落後0比2，返主場必全力收復失地，可惜今仗球隊受傷兵問題困擾，中場哥迪尼爾、後衞艾馬臣杜斯山度士及艾馬臣干斯卡奧皆倦勤，寧捧受讓嘅哥連泰斯。