卡加精神3班勉強

不死鸟

今日要介紹?K287「卡加精神」，係「卡加」系掌門人曾志偉，同幾位友好組成的卡加賽馬團體所擁有，目前「卡加」系3駒既唔完全同主又養響唔同馬房，各自為政都幾特別，「卡加精神」就交畀葉楚航訓練。
同屬自購馬身份的「卡加大師」係曾志偉親自培育，去季來港落4班贏場泥地，總算係有收穫；「卡加精神」就未跑先跛，將來遭遇又係點？呢匹馬來自澳洲昆士蘭，跑兩場一贏一位，賽事總獎金萬3澳元，折算番贏一場只係5萬幾港紙，可想而知水準有幾曳，用彼邦賽績的「威振神駒」做例子，編3班等如坐馬監，4班谷戰至搵到食。睇埋血統，父系Sedaka既是「丹山」所生，半兄弟Lonhro又係一級賽盟主，全靠這些關係，Sedaka無甚戰功都可以配種，多年來只出過匹二級賽冠軍子嗣，堪稱破格例子，個種實際唔多入流，亦難怪之前無子嗣來港。母系為中短途血緣，產下9駒出賽7駒贏過，兩匹曾多捷，其餘的贏一場起兩場止。綜合而論，「卡加精神」評66分唔算有利，新季上陣宜先觀望，跑過三幾仗後再評估實力。