QPR砌紅軍頂住半場細

猪拉多纳

「史獨」再傷抖多3周 巴神難搵食

本來科娜一早有晒腹稿，諗好昆士柏流浪（QPR）主場對利物浦一仗點寫，諗住「紅軍」有主力射手史杜列治復出，應該有望贏波攞3分，正好為香港近期嘅事而心煩嘅利迷送上一場好波，點知未落筆就收到壞消息，「史獨」又再受傷，今場唔使預佢！「紅軍」今個新球季真係黑仔，睇嚟今場作客QPR都係唔易踢，冇咗「史獨」難入波，科娜惟有改捧半場細。

（now 621周日晚8時30分直播）
單箭頭入波有難度

利物浦今季表現大跌Watt，主要係因為神鋒蘇亞雷斯離隊，以及史杜列治養傷咗一段時間，諗住抖咗6周嘅「史獨」今場終於可以復出，同巴洛迪利、史達寧合組「黑色三連星」，點知噩夢未完，「史獨」又試受傷，初步估計將要再缺陣多3個禮拜。

即係話，日前講到明唔鍾意踢單箭頭嘅「巴神」要繼續喺前線單打獨鬥，呢位意大利前鋒絕對唔係「阿蘇」或者「史獨」嗰類型射手，佢需要有人幫佢拉開空位射門或者餵波畀佢，但領隊羅渣士無論出列基林拔或者波連尼呢兩位後備前鋒，都係幫唔到「巴神」手，大舊前鋒林拔跑動慢，亦仲未適應到踢大球會，信心不足，波連尼就明顯同球隊踢法格格不入，威脅唔大。結果搞到「紅軍」冇乜進攻板斧，要靠中場球員數胡，爭取入波每每事倍功半。
卡蘭積卡趕及復出

QPR除咗有主場之利外，體力充沛係佢哋嘅一大優勢，陣中多位主力如查理柯士甸、里奧費迪南、哥爾卡等都唔洗踢國際賽，荷蘭中場利萊費亞喺兩場歐國盃外圍賽都只不過係後備登場，連腳趾有傷嘅卡蘭積卡今場亦趕及披甲，科娜認為QPR今場至少喺上半場有力同國腳如雲嘅「紅軍」周旋到底，半場細有得諗！