技術流對決新不如舊 「雙史」大戰捧天鵝

猪拉多纳

至於英超尾場有「雙史大戰」，由史篤城主場硬撼「天鵝」史雲斯。雖然史篤城一改以往高Q大棍嘅過時打法，但畢竟仍處於轉型階段，面對英超技術流部隊史雲斯，猶如徒弟打師傅，隨時畀史雲斯跳出美妙嘅「天鵝湖」舞步耍到氹氹轉，識揀梗係揀受讓嘅「天鵝」喇！

（now 621周日晚11時直播）
史篤城未成氣候

自紅魔名宿曉士上季接手史篤城後，不斷滲入一些地面組織元素，將呢支昔日只打高Q大棍嘅「天空之城」慢慢轉型，今季曉士針對性引入保贊、馬美迪奧夫、域陀摩西斯等，並刻意棄用粗枝大葉嘅大舊佬約拿芬禾達斯，正正係想改善中前場進攻嘅技術及速度。

不過，轉型唔係一時三刻可搞得掂，況且今仗仲有馬美迪奧夫、阿拿奧杜域、域陀摩西斯及格連韋倫受傷上陣成疑，其中後者乃防線前嘅重要屏障，冇咗呢位愛爾蘭悍將鎮守中場做掃蕩，隨時搞到攻不銳守不穩。
史雲斯受讓有計

史雲斯技術上乘喺英超出晒名，完全係經過馬天尼斯、羅渣士、米高盧特立至現時嘅蒙克等四代領隊嘅心血結晶，絕非一步登天，呢點係史篤城學都學唔嚟。儘管中場核心里安比頓仲養緊傷，但史雲斯今季回收番南韓國腳奇誠庸，以及基菲爾施古臣回巢後，令中場組織未受大影響，甚至加快咗進攻速度，基菲爾施古臣上周中更帶領冰島爆冷擊敗世盃季軍荷蘭，狀態弗到漏油。

因此轉型冇耐嘅史篤城喺史雲斯面前，有如邯鄲學步，反而自暴其短畀人玩番轉頭，就算有地利都信唔過，「天鵝」有得受讓梗係捧讓球客勝。