銀河海灣者大駁火

猪拉多纳

爭常規賽一哥晒冷

美職西岸榜首大戰，洛杉磯銀河主場硬撼西雅圖海灣者，雙方都淨番兩場波就踢完常規賽，海灣者依家跟銀河同分，有咩閃失隨時失去西岸一哥位置，作客都要採取主動，全力搶攻，好彩主力射手馬田斯同丹普西狀態都托弗，今場大盤唔怕追！

（TVB 301周一早上8時15分直播）

銀河同海灣者係整個美職火力最強嘅球隊，皆因兩軍都有星級攻擊球員，銀河嘅「三叉戟」羅比堅尼、薩迪斯同當路雲合共為球隊攻入四十五球，佔全隊入球總數超過六成，非常誇張，球隊近八場美職賽事入咗二十二球，今場仲有啱啱踢完國際賽嘅羅比堅尼回歸，咁強大嘅火力，更加唔怕同海灣者鬥攻啦！
海灣者入得又失得

海灣者今季入球就主要靠晒「美國隊長」丹普西同馬田斯數胡，以佢兩位名將級數，根本唔需要擔心海灣者入唔到波，球隊今季防守方面做得好唔掂，踢咗三十二場波竟然失咗四十八球，場均失球達一點五球，今場更要為攞三分焗攻，相信防線會出現更多漏洞，隨時入得多時失得更多，入球大梗係咪錯過啦！