中央陸軍頂唔到半場

猪拉多纳

閉門迎曼城 冇第12人撐住

今晚歐聯早場上演E組「閉門戰」，由兩戰不勝嘅英超班霸曼城作客俄超勁旅莫斯科中央陸軍，後者因球迷種族歧視被罰閉門作賽，頓失主場氣勢，「藍月亮」前鋒阿古路腳風順到冇朋友，喺出線形勢告急今仗必搶韁，希望早早鎖定勝局，2倍半場客勝不容錯過。

（有線61、64、201及203台周三凌晨零時直播）
阿古路弗爆 一個夠殺

莫斯科中央陸軍喺今屆首輪作客被羅馬怒炒5比1之役，由於有部分粉絲對主隊球員作出種族歧視舉動，唔單止被歐洲足協判罰該隊球迷之後兩仗作客禁止入場睇波，其餘3仗主場都要閉門作賽，因此繼上輪0比1輸畀拜仁後，今晚續於空無一人嘅希姆基球場迎戰曼城。其實中央陸軍喺俄超就也文也武，出到水平極高嘅歐聯根本唔見得人，依家冇埋「第12人」撐場令主場氣勢大減，加上「新沙皇」迪沙高耶夫停賽惡唔出場。

雖然曼城近3屆歐聯兩度於分組賽畢業，但經「智利工程師」比歷連尼改造後，上屆突破殺入16強，協助眾將走出逢歐戰信心不足嘅心理毛病。事實上曼城人腳超班，由於早前國際賽關係，上周六英超對熱刺比帥特登冇將耶耶托尼、祖維迪、費蘭甸奴等主力打正選，等佢哋可以抖抖，不過淨係一個阿古路都夠殺，呢位着晒火嘅阿根廷國腳食出「大四喜」，若非上半場12碼宴客已經入夠5粒，真係勒都勒唔住，加埋佢嘅前鋒拍檔迪斯高今仗抖夠復出，火力全開下真係勁到冇朋友。
2戰只得1分 開波即搶

曼城喺E組頭兩仗對住勁敵拜仁及羅馬只得1和1負排第3，落後畀佢哋5分及3分，出線形勢唔多樂觀，今仗對呢組實力最弱嘅中央陸軍，絕對係非勝不可，背水一戰下眾將鬥心毋須懷疑，即使天氣低至攝氏零下五度，相信一開波會即刻搶韁爭勝。

睇番上屆兩軍同樣喺分組賽同組，當時「藍月亮」兩戰中央陸軍贏晒之餘，兩場都係上半場已經lead住對手，依家出線情況不利，曼城必想早早領先穩定軍心，客勝得1.48倍冇乜肉食，不妨博有2倍分頭嘅半場客勝。