卡卡助拳聖保羅擸Ｗ衝冠

猪拉多纳

歐聯星光熠熠好戲連場，地球另一邊嘅巴甲亦唔差，特別係聖保羅借用卡卡後，唔止星味大增，連成績亦有進步，近6仗贏咗5場，依家全力衝刺爭標。聖保羅明早作客下游球隊查比高恩斯，平手盤聖保羅起碼坐和望贏，值得支持。

（周四早上8時開賽）

卡卡今夏轉投美職新成立球隊奧蘭多城，但要到下季先至會參賽，所以現時被外借去母會聖保羅，保持比賽狀態。聖保羅有佢助陣下，成績穩步上揚仲殺上聯賽次席，有力挑戰冠軍寶座。聖保羅陣容唔錯，除卡卡外仲有路爾斯法比安奴、甘素、「射手門將」羅渣里奧等球星，球隊有姿勢有實際。羅渣里奧上仗又射入靚罰球，今季已有8球進帳，認真神奇，即使柏圖有傷在身，球隊仍有入波本錢。
揀埋高士路及哥連泰斯

查比高恩斯今季升上巴甲，但一直喺榜下游徘徊，唯一可取之處係主場硬淨，近6次主場不敗。因此兩軍排名有距離下今場仍開出平手盤。聖保羅實力高一班加上要搶分爭標，絕對唔會放過查軍。

另兩場巴甲推介，榜首高士路上仗贏波，結束3連敗，主場對住防線不穩、兼有多位主力缺陣嘅彭美拉斯，有力再下一城。另外，哥連泰斯上仗力挫國際體育會，踢出近期代表作，主場對狀態低迷嘅維多利亞，值得追多一鋪。