肥安重用聖卡斯攞3分較飛

猪拉多纳

今晚最重要之戰役，唔使問阿貴，梗係西班牙國家打吡皇馬主場硬撼巴塞喇，雖然樓上同文小貝已經講咗，但貴為歐洲球壇最頂尖嘅比賽，Peter點可以唔評吓。今仗可謂星光熠熠，皇馬坐擁C朗、占士洛迪古斯及賓施馬等球星，可以話係繼「7條煙」年代後最強勁陣容，但對手巴塞都唔係善男信女，唔單止有王牌美斯同尼馬，刑滿嘅「咬人蘇」蘇亞雷斯亦可復出殺敵，個個喺鋒線都獨當一面，梗係對攻喇，唔通入咗教堂仲要裝香咩？至於邊隊贏面較高，Peter認為喺兩邊鬥攻格局下，或者會出現多士哥嘅和波。
門將年紀大易出錯誤

雖然皇馬有主場之利，但若然主帥「肥安」安察洛堤依然故我，起用已到黃昏階段嘅門神「聖卡斯」卡斯拿斯，絕對係一大死穴，，一個有功力嘅資深教頭冇理由喺呢類咁重要嘅防守位置，起用年紀大、反應慢嘅球員，一名門將如果老化，落地撲救可能會慢半拍，手力亦冇以前咁勁，就會出現飛身擋到都照入嘅尷尬情況，猶如將勝利掟落鹹水海。至於巴塞季初冇「咬人蘇」一樣成績理想，依家高踞榜首，今仗就算作客巴拿貝球場，但Peter覺得佢哋起碼有機會打和，唔畀對手全取三分。

金句：重用黃昏嘅後衞龍門，等如將勝利掟落鹹水海