三線都咁強 車路士唔赦曼聯

猪拉多纳

今晚英超重頭大戰曼聯主場鬥車路士，度士會比較睇好車路士。事實上，今年車路士開季踢得幾順，主力陣容轉咗幾名球員都好啱用，本來前鋒線有迪亞高哥斯達喺度非常煞食，可惜佢有傷今仗應該唔踢得。不過，由「魔獸」杜奧巴代替佢上陣，相信對車仔嘅攻力影響唔會好大。

車路士中場除咗法比加斯搶鏡外，仲有一位球員踢得非常起眼，佢就係尼曼查馬迪，此子身形健碩，防守意識強，具備頂級中場嘅質素。度士一直認為現代足球中場線非常緊要，尼曼查馬迪就做到攻守兼備。法比加斯就更加唔使講，畀波又得自己入去射門亦得；而防線實力亦有所加強，由經驗豐富嘅泰利領軍，畀到人信心，所以車路士三條線其實都好穩陣，今仗對曼聯雖然係作客，但都唔使太擔心。
法卡奧尹佩斯位置重疊

曼聯開季表現唔係咁好，而前鋒線上朗尼今仗要繼續坐波監影響極大，而雖然法卡奧同尹佩斯都係頂級前鋒，但二人位置有啲重疊，隊友有時真係唔知畀波邊個射好。而曼聯近期場場都有失波，可見後防好有問題，所以今仗雖有主場之利，但查實冇乜優勢。始終車仔剛剛喺歐聯大炒對手一場，球隊信心爆晒棚，因此度士睇好作客嘅車路士今仗可以坐和望贏。