挑戰高難度圖爆拜仁 慕遜加柏有大志

猪拉多纳

周日德甲重頭戲演榜首大戰，次席嘅慕遜加柏主場挑戰班霸拜仁慕尼黑，兩軍狀態都弗到爆，慕遜加柏球會經理艾伯尼賽前刻意造勢，指現時球隊正重返七十年代霸主時期嘅正軌，今仗雖然面對超級對手，但揚言會盡力嘗試喺全場爆滿嘅保路西亞公園球場一挫強敵，擺明唔會主守。雙方近期前線都着晒火，今晚對攻下入波唔會少，黑柴一於捧大盤。

（有線61及64台周一凌晨零時30分直播）

慕遜加柏以平民球會身份取得理想成績，要多得高層對教練法夫爾嘅信任，唔似得好多德甲名門咁，輸幾場就換帥。球隊喺法夫爾領導嘅三年零九個月時間穩步前行，呢位教練睇餸食飯使費唔多，球隊陣容每年變動甚少，但都能夠針對適當位置買入超值球員，季前年輕門將達史特根畀巴塞撬走，即刻買入瑞士二號國門恩尼森馬填補，中場領袖艾蘭高年事已高協議解約，又廉價搵嚟新進德國國腳快翼安達夏恩，兩個變動令整體戰鬥力進一步提升。球隊開咧至今三線作戰十四場賽事全數不敗，過去一個禮拜先後大炒漢諾威同阿波羅利馬素，共轟入八球不失一球，狀態弗得交關。
主隊留晒力砌榜首戰

慕遜加柏對今仗做足準備，剛周中歐霸盃對阿波羅利馬素，一對弗爆箭頭麥斯古斯同拉菲爾基達奴各踢半場，主力安達夏恩同法比安莊臣輪休，擺明留力今仗，艾伯尼同法夫爾賽前都講明拜仁嘅超級實力當然值得尊重，但慕遜加柏既冇壓力亦有信心，今晚終極目標係要拜仁嘗到今季第一場敗仗，雖然佢哋明白難度超高，要踢出完美表現至有機會，但勇氣已經值得嘉獎。

拜仁實力超班，計近況比慕遜加柏更加銳利，教練哥迪奧拿經過超過一年摸索同失敗，近期戰術上亦見妥協，容許球員喺適當時候踢更直接足球，有別於上季為控球而控球，過去一周聯賽對雲達不來梅同歐聯對羅馬，兩仗都開出其他贏波膽，共轟入十三球，幾位攻擊手洛賓、馬里奧葛斯同羅拔利雲度夫斯基都弗到爆燈。今晚乘勝追擊，要爭取入球難度唔高，不過慕遜加柏可以話係拜仁今季聯賽所遇嘅最弗對手，以哥帥嘅三人防線戰術能否抵擋主隊高速反擊存有疑問，拜仁今仗贏面雖較高，但客Ｗ過熱唔值博，捧大盤好過。