紅魔 車仔師徒做細界

猪拉多纳

「迪哥」有傷 藍戰士收油？

「寸王」莫連奴向來牙擦擦、寸寸貢，最鍾意賽前出口術。今晚「紅藍大戰」曼聯喺奧脫福硬撼車路士，但莫連奴到目前為止仲未出任何口術喎，唔通對住師傅尹戈爾想留力？其實榜首嘅車仔開季至今8戰不敗，拋離曼聯10分咁多，今晚踩場去到紅魔地頭，話唔定「寸王」真係畀番幾分薄面呢位昔日恩師，叫班球員收油呢！況且入球機器迪亞高哥斯達又傷又病，已經缺陣2場比賽，就算今晚好番復出都未必有態，一於捧1.88倍入球細。

車路士今季係威係勢，8戰7勝1和入咗成23球，係20支英超球隊中攻擊力最猛。而且佢哋喺歐聯同樣表現出色，3場分組賽未輸過，上場更大炒馬里博爾6蛋，上季嘅「藍色大巴」脫變成為「藍色戰車」。
車仔雷米傷埋前線死火

事實上車仔鋒力咁勁，全靠入球機器迪亞高哥斯達，呢位西班牙射手今季已經射入9粒，但佢早前代表西班牙國家隊受傷後，車仔近2仗都缺陣，最慘係佢仲被病毒感染，情況似乎好嚴重，今晚就算趕得切復出都未必有態。而另一射手雷米今晚亦肯定唔掂，車仔火力隨時大減。況且尹戈爾係莫連奴昔日恩師，莫連奴話唔定會畀吓面，叫班手足唔使開行Turbo。
曼聯1月斟加雷穩後防

曼聯今季一直表現麻麻，領隊尹戈爾都知隊波仲要執，英國《鏡報》尋日話，尹帥計劃出年1月搶辛尼特嘅阿根廷中堅加雷，希望靠呢位仁兄穩定防線。雖然紅魔近3場聯賽未輸過，但查實對手只係西布朗、愛華頓同韋斯咸之類嘅二線球隊，隊長朗尼今晚繼續坐波監，另一王牌尹佩斯今季狀態麻麻，8戰只射入2球。唯一好消息係上場對西布朗傷出嘅「天使」迪馬利亞可披甲上陣，但狀態係點冇人知，都係捧1.88倍入球細好路。

（周一凌晨0:00 now621直播）
盤路解碼

車路士近5次同曼聯交手開出3口入球細。
Data King：車仔今季半場不敗

‧車路士近6次交手未輸過畀曼聯，往績佔優。

‧藍戰士今季未試過半場落後。

‧車路士連續12場有波入。
乜都玩錦囊：紅魔後防曳平手捧車仔

車路士今季狀態大勇，開季12場取得10勝2和，就算迪亞高哥斯達今仗未必踢得，整體都比紅魔優勝。曼聯最近戰績係有改善，但後防依然唔穩陣，對住擅打反擊嘅車仔實在難予信心，平手盤捧1.81倍藍戰士。