新兵踢到曉「菲」撐馬體會讓客

猪拉多纳

西甲今晚又有好戲上演，基達菲將會喺主場迎戰馬德里體育會，合演「馬德里打吡」。基達菲係典型嘅欺善怕惡二流波，今季繼續保持呢種風格，對同級球隊就搏命搶分，一對住實力高少少嘅勁旅就毫無招架能力，今晚遇着狀態「托弗」嘅馬體會，張峰相信基達菲又係時候「遇強即屈」，撐馬體會開2.5倍「讓球客勝」。

（now632台及TVB13周一凌晨4:00直播）
基達菲遇強即屈 上季對賽吞9蛋

講真嗰句，基達菲狀態其實算係唔錯，連續保持3場不敗之餘，上仗更喺補時階段連隊兩粒，反勝皇家蘇斯達，士氣可能真係非常好。之不過咁喎，基達菲前幾輪對住實力叫做好少少嘅切爾達、華倫西亞同西維爾，輸晒不特止，仲場場以兩球差距落敗，毫無招架能力，反映出呢隊波質素根本係「有限公司」，今仗對住上季兩循環對賽，合共派出9隻光蛋嘅馬體會，輸少過兩球都當贏啦！

係，今夏放走唔少主力嘅馬體會，季初表現的確冇上季咁醒神，但可以理解嘅，始終新兵磨合需時嘛！咪就係因為咁，馬體會已經漸入佳境，近6仗贏咗足足5場，周中喺歐聯仲大炒瑞典班霸馬模5:0，新加盟嘅文迪蘇傑，左翼基沙文等經過一輪磨合後，同隊波愈嚟愈夾，周中咪因為咁齊齊入波囉！
馬體會返晒嚟 近6戰5場零失球

最重要一點，係馬體會季初條走晒樣嘅後防線，執完一輪之後已經改善番好多，近6戰有5場都保持住清白之身，攻守都回復水準，今晚再遇「私房菜」基達菲，要請對手食多鋪蛋，唔難啫！
Data King：基達菲旺「半細」

‧基達菲連開4口半場入球細。

‧近3次主場鬥馬體會，基達菲1球都入唔到。

‧馬體會上季西甲雙殺基達菲，總共射入9球兼冇波入。
乜都玩錦囊：補埋2.1倍「半和」博雙贏

馬德里體育會係技高一籌，但考慮到佢哋周中先搏完歐聯，體能上或多或少輸蝕，造訪近4仗半場都保住不失嘅基達菲，預計要到下半場先咬得入，補多個2.1倍半場和博雙贏。