山形勁使「橫」手谷票房

猪拉多纳

爭入升班附加賽，拉客增加觀眾量，係山形山神季尾嘅目標，所以今日山形主場對FC橫濱場日乙波，唔只勝負咁簡單，山形要贏仲要贏得好好睇睇，主讓半一嘅2.12倍上盤抵博。
搞女士日x萬聖節P

山形呢期好威，日乙主場4連勝，入咗升班附加賽競逐圈，但係論觀眾量佢哋就好閉翳，平均每場得5,926至6,000人咁上下，喺聯賽前10名入面僅僅好過北州向日葵，其他8隊除咗京都不死鳥得7,500人，剩低7隊都超過8,000人，票房收益少，自然影響埋贊助吸引力，於是山形就希望借季尾幾場波谷吓，好似今日就「女士日」、「女子足球教室」加「萬聖節P」一齊搞，南瓜濃湯150日圓（約港幣10蚊）就有交易，半場又有萬聖節化裝巡遊，女性入場參加攝影活動仲可能獲獎，用盡方法吸客。

但係歸根究柢，一隊波要成績掂至有人睇，山形自然明白箇中道理，所以佢哋一定要搏入附加賽，最好仲升班上日職添，目標非常鮮明。不過以家陣積分形勢嚟講，山形雖則排第6位，但只比岡山、大分多1分，多過札幌、京都3同4分，即係話後面隊隊都有權過佢頭，最後5輪比賽贏少場都可能唔掂。

由於非勝不可，山形即使有小林亮、石川龍也兩件後衞養緊傷，今日依然可以睇高半線，事關FC橫濱唔只西島弘之、市村篤司剛啱先好番，未跟大隊操足，而且近4場作客未贏過，爭入附加賽機會又比較微，戰意及唔上如狼似虎嘅山形，受讓都唔值博。

（日）5 山形山神 Vs FC橫濱