後備車手夠劏乙組仔

猪拉多纳

周日剛激鬥完曼聯嘅車路士，今晚話咁快又要喺英格蘭聯賽盃16強作客梳士貝利。車仔主帥莫連奴叫得做「寸王」，就乜都要叻要威，英聯盃當然都唔會放過，佢哋勝在兵源充足，就算出穆罕默德沙拿、葛特蘇馬、尼敦阿基等後備「車手」，都夠料炒起乙組仔梳士貝利，直取讓球客勝。

（TVB 301周三凌晨3時45分直播）
寸王盃仔都照殺

車仔主帥莫連奴對於獎盃嘅態度一向係大小通殺絕不嫌多，佢首度執掌車仔嗰陣就曾兩奪英聯盃，07年決賽明知對手阿仙奴派新仔落場，佢都照排強陣應戰，唔怕畀人話大蝦細，因此「寸王」係少有重視英聯盃嘅豪門領隊。雖然車仔啱啱先喺踢完聯賽，短短兩日又要出擊未必回到氣，但正係喺奧脫福作臨尾失波，令莫連奴火都嚟埋，實行要搵梳士貝利發洩。

何況殺雞邊使用牛刀，車仔人才鼎盛，「寸王」應會畀班正選休息，淨係後備門神施治都超晒班啦，仲有「埃及美斯」穆罕默德沙拿、尼敦阿基及葛特蘇馬等副選等緊上位，呢場正係爭取表現嘅良機。
梳士貝利差幾班

梳士貝利喺乙組就也文也武，唔出得大場面，同呢架「後備車」比，真係差好多班。加上近6次交手車仔未輸過兼5次贏波，讓球主客和車仔只係讓一球，斯維梗係力撐讓球客勝。