豪門飲盃淺嘗即止 三線作戰唔敢去盡

猪拉多纳

豪門周中約埋一齊去飲「盃」！今晚德英西盃賽好戲連場，三大富豪勁旅拜仁慕尼黑、曼城、皇家馬德里分途出擊！傳統大球會一向視本土「盃仔」為雞肋，食之無味，棄之可惜。一方面想袋多隻盃，耀武揚威，但亦因有聯賽及歐聯後顧，而未敢搏得太盡，顯得進退失據，甚至埋下爆冷伏線，令賽事更耐人尋味。到底三巨頭今晚會傾力「暢飲」，亦或「淺嘗」了事，大家拭目以待。
曼城速擒紐卡素沖喜

今晚英格蘭聯賽盃16強重頭戲，由上屆盟主曼城坐鎮主場迎戰「喜鵲」紐卡素。曼城經歷兩場不勝，梗係想贏波沖喜吓喇，但嚟緊聯賽大戰曼聯更加重要，今仗必想早早入波速食「喜鵲」，無謂去到咁盡，留番啲力備戰曼市打吡，不妨轉捧半場主勝。

（TVB 301周四凌晨3時45分直播）

曼城近期黑仔到暈，先喺上周中歐聯領先兩粒下遭莫斯科中央陸軍逼和，令出線形勢告急，跟住返聯賽又被韋斯咸擊敗，遭榜首車路士拉開到6分距離，令衞冕英聯盃忽然變成要務，況且佢哋急需一場勝仗激勵士氣，整定紐卡素唔好彩喇。不過曼城嚟緊周日聯賽將硬撼同市死敵曼聯，雖然紅魔依家唔係「藍月亮」嘅爭標勁敵，但打吡戰贏輸關乎「飛士」，曼城梗係想繼續騎住死敵做曼市霸主，今仗對紐卡素難免有啲保留。
喜鵲兵疲半場都難捱

好彩曼城勝在人強馬壯，陣中只得林柏特及拿斯尼兩名傷兵，主帥比歷連尼為免夜長夢多，今仗好大機會照派迪斯高、耶耶托尼、高柏尼等打正選，務求盡快入多幾粒，早早鎖定勝局，去到下半場就收起嗰班主力，留力曼市打吡。其實曼城近年食住「私房菜」紐卡素，之前6次交手錄得5勝1和佳績，5次贏波都咁蹺喺上半場已經領先，證明佢哋最鍾意速食「喜鵲」，況且紐卡素仍有大衞辛頓、施安迪莊、利維亞尼、高迪等大批十字兵，射手柏比斯施斯上陣成疑，剛激戰反勝熱刺亦耗力唔少，今仗作客「藍月亮」有心無力，由於主勝太熱冇肉食，斯維建議轉玩曼城半場主勝。