拜仁玩輪換細啖漢堡

猪拉多纳

德國盃第二圈重頭戲演南北打吡，傳統北方勁旅漢堡主場迎戰南方霸主拜仁慕尼黑，漢堡近年家道中落，已無復昔日豪門風範，實力同拜仁明顯有一大段距離，不過拜仁近期實在太繁忙，呢場盃仔係佢哋近期最唔重要嘅比賽，預期教練哥迪奧拿會採輪玩制，面對主場有一定威力嘅漢堡料小勝居多，入球大細中位數調整到3.5球，細盤可取。

（無綫明珠台周四凌晨3時30分直播）

拜仁啱啱喺星期日作客同慕遜加柏互交白卷，雖然失咗兩分，但上至教練哥迪奧拿，下至一眾球員，都已經對表現同結果感到滿意。

拜仁近期真係忙到嘔，佢哋嚟緊星期六晚就會喺聯賽火併死敵多蒙特，雖然對手今季德甲戰績曳，但仇人見面點都唔衰得，嚟緊下周中又要踢歐聯，所以今場難免要作出輪換，上仗擔正嘅馬里奧葛斯、湯馬士梅拿同貝拿迪亞將會輪休，雖然未致對球隊實力構成大影響，但咁多波踢點都留有一手，作客冇必要大炒對手。
漢堡遇強愈強好守得

漢堡啱啱喺德甲作客首都慘吞哈化柏林三蛋，演出仍然幾反覆，不過賽後會方向傳媒公布，對暫代主帥辛巴亞嘅表現感到滿意，已經同佢傾好條件簽長約，派晒定心丸，記得辛巴亞喺五星期前上任，首場比賽就係德甲主場對拜仁，結果令人意外咁摸和0比0，雖然球隊之後演出上上落落，但表現遇強愈強，面對勁旅專心防守，搞到兩大班霸拜仁同多蒙特都入唔到佢哋波，今晚再戰拜仁當然照辦煮碗，預料今仗入波唔會多。