曼城開猛火 歎喜鵲私房菜

猪拉多纳

主場強勁副選夠秤

開講有話冤家路窄，曼城同紐卡素繼上屆英聯盃16強碰頭，今晚再喺英聯盃同一階段互撼，爭逐8強席位。衞冕曼城雖然近兩場都贏唔到，同紐卡素啱啱攞到季內首個兩連勝相比，情況各走極端，之不過「藍月亮」近年食到「喜鵲」應一應，今晚主場再遇「私房菜」肯定擦餐飽，趁機振奮士氣，1.65倍「讓主」值捧。

（TVB301台、廣東體育周四凌晨3:45直播）

「藍月亮」繼歐聯被莫斯科中央陸軍逼和，日前英超又輸畀韋斯咸，連續兩場作客都贏唔到波，睇落演出唔多對辦。好在佢哋返到主場就唔同講法，除咗上圈英聯盃怒炒錫周三7:0之外，今個月中喺英超以4:1擊敗熱刺一役，更有箭頭阿古路食出大四喜。再者曼城嚟緊周日英超將喺「曼徹斯特市打吡」硬撼曼聯，將帥今晚都想以大勝提振軍心，去迎接呢場打吡。
板櫈夠深 聯賽避戰抖夠

事實上，曼城板櫈深度勁厚，根本夠砌兩套頂級正選陣容，其中上圈英聯盃擊敗錫周三，正選落場嘅沙格拿、費蘭甸奴、迪米捷利斯、占士米拿、高拉洛夫等多名猛將，喺日前聯賽唔係全程退居後備，就係後備入替踢唔夠一個骨，個個養精蓄銳，今晚落到場勢必如狼似虎撳住搶！
紐卡素多傷兵 焗住輪換

相反陣容單薄得多嘅紐卡素，雖然聯賽連贏兩場，表現重返正軌，可惜佢哋傷兵潮仍然未過，柏比斯施斯、利維亞尼、施安迪莊、迪奧迪等中前場都要養傷。最慘係「喜鵲」嚟緊英超要惡鬥利物浦，相信主帥柏杜無可奈何下都要輪換，搵艾約斯佩雷斯、希達拉、阿比特等副選擔正，令戰鬥力進一步削弱。而且喺英超開咧戰主場淨吞曼城兩蛋嘅「喜鵲」，近6次造訪曼城全部輸晒，每場最少失兩粒，今場點頂得住「藍月亮」呀！
Data King：近14次交手曼城最少入2球

‧曼城近6次主場鬥紐卡素全勝。

‧兩軍近14次對碰，「藍月亮」每場最少攻入兩球。

‧曼城今季主場半場從未落後，開出2次「半主」及4次「半和」。
乜都玩錦囊：往績旺大1.4倍照追

曼城近年食住紐卡素，最近14次對壘，每場最低消費入兩粒，小讓一球嘅「讓主」當然值博。此外，「藍月亮」近6次主場鬥「喜鵲」贏晒不特止，仲全部開「大」，雖然今場入球大得1.4倍奀咗啲，但勝在夠穩陣嘛！
盤路解碼

上屆英聯盃16強賽事，開出6雙2單。