維羅納拉素合演入球騷

猪拉多纳

周中意甲快車壓軸戲碼，維羅納主場迎戰拉素，前者聯賽連輸兩鑊甘，後者正值4連勝強勢，諗住揀客勝實冇走雞？未必！事關佢哋每逢意甲碰頭，主場一方例牌踢得醒神，過去11場從未落敗，既然今場勝負難料，兩軍近年交鋒又必演入球騷，一於撐1.88倍入球大。

（TVB301及廣東體育周五凌晨3:45直播）

維羅納中堅馬基斯坐完波監復出，點知輪到後防拍檔拉菲爾馬古斯打柴，三人防線唔齊腳，有助今場「製造」入球大。老牌射手東尼雖然狀態麻麻，但佢咁多年意甲生涯，除咗攻入帕爾馬最多波，緊隨其後就係拉素，今場實趁機撻着番副偈，加上連續兩輪喺勁旅身上搵到入波嘅尼高拉斯盧比斯數胡，鋒力唔能夠睇小。

拉素聯賽連下四城勢如破竹，但佢哋對上4次造訪維羅納全輸，客勝隨時係糖衣陷阱。拉素箭頭菲臘佐積域近期着晒火，近4場聯賽獨取5球，而德國傳奇射手高路斯終於喺上輪意甲射入開齋波，要維持近期強勁進攻火力唔難。更何況維羅納同拉素好似有仇咁款，每次對壘踢法都有前冇後，計埋意甲同意盃在內近6次對決，都能夠互相攻破對方大門，聯手炮製咗37個入球，每場平均6球有多，今場唔捧「大」等幾時！