地頭龍拜仁 夠鑊氣

猪拉多纳

蜜蜂兵團聯賽飛唔起

正所謂風水輪流轉，多蒙特季初德超盃砌低宿敵拜仁慕尼黑後愈踢愈沉，相反拜仁喺歐聯、德甲同德盃發展都順風順水。今晚兩軍會師安聯球場合演國家打吡，主隊嘅洛賓同列貝利有望季內首演雙翼齊飛，倒戈嘅羅拔利雲度夫斯基近期亦頻有斬獲，要大勝頹爆「蜜蜂兵團」話咁易，揀2.12倍「讓主」！

（有線61、64、201、203及中央5台周日凌晨1:30直播）
洛賓列貝利雙翼齊飛

拜仁踢咗9輪聯賽6勝3和未輸過，期間攻入21球僅失2球，攻守數據傲視同儕。齋睇安聯球場戰績嘅話，更可以「恐怖」形容，聯賽連歐聯主場正值6連勝，當中最近4戰聯賽更豪取16球，平均每場有4球進帳，仲全部保持不失，邊隊作客去到都有排驚。

再者，兩大快翼洛賓同列貝利今季輪住傷，至今都冇機會施展雙翼齊飛，但今場極有可能孖住擔正，令進攻火力進一步提升。至於喺德超盃演出一般嘅羅拔利雲度夫斯基，經過一段時間磨合後，漸漸融入球隊進攻體系，最近5次披甲斬獲4球，今晚再戰舊會多蒙特，勢必搏盡力爭倒戈首球！湯馬士梅拿呼籲隊友提防多蒙特嘅快速反擊，明顯有備而戰。
多蒙特德甲啞火4連敗

另邊廂，「盃賽醒神、聯賽頭痕」足以形容多蒙特目前狀況，佢哋雖然喺歐聯同德盃贏到開巷，5戰勁入16粒，但一返到聯賽就甩晒轆，自9月中兩連勝斷纜後6場未贏過，近期仲連輸4場僅入2球，搞到依家距離聯賽榜降班區只有一分之差，落後拜仁14分，更加係近30年嚟雙方最大差距。加上主將馬高列奧斯同「蜜蜂兵團」續約傾唔埋欄，盛傳佢會跟隨馬里奧葛斯同「羅拔仔」過檔拜仁，令到軍心動搖，今場想唔輸鑊甘都難。