今晚好波曼曼歎

猪拉多纳

打吡大戰 紅魔攻「城」不落「下」風

周日晚有乜好節目？當然係買定啤酒花生，坐定定喺電視機前睇星光熠熠嘅曼徹斯打吡大戰，由曼城坐鎮主場火併死敵曼聯啦！上季盟主曼城近期黑到冇朋友，連場不勝之餘，中場核心大衞施華亦因傷倦勤，嚟緊周中歐聯對莫斯科中央陸軍更係非勝不可，難免要留力，撞正有「打吡士哥王」朗尼刑滿復出嘅曼聯，實在有啲勢危，紅魔受讓半一實在超筍，呢個下盤不容錯過。

（now 621周日晚9時30分直播）
留力踢歐聯生死戰

雖然屬打吡大戰場合，為「飛士」大家一定搏甩髀，但現時曼城處於進退維谷嘅艱難時期，自從歐聯領先兩粒下遭莫斯科中央陸軍逼和後，上場聯賽爆冷輸畀韋斯咸，然後上周中英聯盃喺主場再被紐卡素淘汰，兩大中場大衞施華及耶耶托尼更先後傷出，前者證實因膝頭韌帶受傷要抖3周，今仗唔使預佢，對中場組織大受影響，加上連續3場未贏過，無疑打擊眾將信心，就算王牌阿古路幾弗都獨力難支。

再睇遠啲，由於曼城喺歐聯3戰僅得2分，出線形勢危殆，嚟緊周中返主場再鬥中央陸軍不容再失，正所謂歐聯大過天，有傳若「藍月亮」於歐聯有乜依郁，主帥比歷連尼可能烏紗不保，何況聯賽仲有漫漫長路，呢位「智利工程師」難免有所取捨。

相反曼聯雖有法卡奧受傷，但中場卡域克傷愈可候命，最重要係坐咗3場波監嘅朗尼刑滿復出，將夥拍尹佩斯打雙箭頭。事實上「魔童」對親曼城都特別Sharp醒，佢喺22次為紅魔出戰同市死敵一共轟入11粒，早已超越名宿卜比查爾頓（9球）榮膺「打吡士哥王」，咁蹺佢近5個打吡入波，全部都係曼城球場取得，認真老利。
朗尼復出火力更猛

況且今仗係朗尼首次以隊長身份領軍，定必加多兩錢肉緊。配合迪馬利亞、尹佩斯同迪馬利亞等拍檔火力全開，仲唔趁「藍月亮」四面楚歌下踩多兩腳咩？斯維唔敢講紅魔今仗贏硬，但絕對有力全身而退，有得受讓半一，必撐下盤！