紅魔鐵三角 喪攻抗曼城

猪拉多纳

「曼市打吡」今晚殺到埋身，今晚曼城喺主場硬撼曼聯。近年「紅魔」畀「藍月亮」騎住，若想爭番口氣今晚有「餐士」，事關餓波餓咗好耐嘅王牌朗尼今仗復出，夥拍尹佩斯同迪馬利亞合組攻擊鐵三角，絕對有能力搞掂近況低迷嘅曼城。呢場波曼聯受讓平半，1.74倍下盤玩得過！
曼聯卡域克 伊雲斯復出

曼聯今季繼續成為球迷笑柄，但經歷季初低潮後，最近明顯有起色，上仗逼和車路士，睇到班波有番「費Sir時代」嗰種後勁同魔性，加上傷兵問題紓緩，卡域克同莊尼伊雲斯都可以候命，中後場畀番球迷唔少信心。

雖然射手法卡奧打咗柴，好彩朗尼已經坐完3場波監，呢位「曼市打吡」入球紀錄保持者（11球）餓波咁耐，今晚肯定會搵曼城出氣。英國傳媒透露，領隊尹戈爾會收起桑馬達，派朗尼夥拍尹佩斯打雙箭頭，再由迪馬利亞從後支援，3位球星今季英超夾埋有9個士哥，趁住曼城貴價中堅文加拉仲未適應英超節奏，呢個攻擊鐵三角有力玩殘曼城後防。
大衞施華抖3周 曼城3仗勁失6球

計牌面，衞冕嘅曼城無疑係勝一籌，但佢哋最近突然大跌Watt，繼歐聯畀莫斯科中央陸軍逼和後，喺聯賽同聯賽盃先後輸畀韋斯咸同紐卡素，近3仗足足失咗6球，睇得出防線有問題。最濕滯嘅係，中場靈魂人物大衞施華因傷抖3周，耶耶托尼今季又回晒塘，點睇都唔似讓得起曼聯喎！

今晚9:30 now621直播
盤路解碼

曼聯今季9場聯賽取得3勝4和2負成績，不敗率達78%。
Data King：曼城雙箭打吡多士哥

‧雙方近8次交手，7次開入球大。

‧兩軍近6次聯賽交手，曼城取得5勝1負。

‧迪斯高同阿古路對上5次聯賽交手各轟入4球。

‧朗尼係打吡士哥王，近5次英超作客曼城入4球。
乜都玩錦囊：鋒線夠睇頭「大」鬥法

曼城雖然有大衞施華受傷，好在仲有習慣射爆紅魔大門嘅迪斯高同阿古路候命。紅魔亦有「曼市打吡」士哥王朗尼復出，配合回勇嘅尹佩斯攻堅，雙方鋒線夠晒睇頭，1.59倍入球大唔好錯過。