前鋒Fit到漏 廠仔主場「德」心應手

猪拉多纳

阿仙奴上周英超主場炒般尼3蛋，近3仗全勝認真叻仔，今晚佢哋喺歐聯D組繼續主場出擊，對住比利時勁旅安德列治，梗係想延續連勝走勢。咁啱對手安德列治近況有啲飄忽，上一輪主場迎戰「兵工廠」都係輸波收場，今戰去到酋長球場睇怕都係凶多吉少，1.78倍「讓主」抵捧！

(有線64、203周三凌晨3:45直播)
安德列治5戰得1勝

「兵工廠」近3場表現雖然唔算最好，但係贏波至實際。王牌阿歷斯山齊士上場梅開二度，近4場有5個士哥，表現Fit到漏油。不過講到Fit又點只山齊士一個，普多斯基上場都有幾次精彩埋門，如果唔係條門柱阻住晒，般尼可能輸得仲甘。「麻煩槍手」韋舒亞上場冇落場，相信係為今場歐聯大戰留力，有佢喺中場策動，就算指揮官奧斯爾長抖都冇咩所謂。

至於對手安德列治，呢支比甲榜首球隊近排表現麻麻，近5戰只贏得1場咁大把，近況唔多掂今晚作客到酋長球場，肉隨砧板上，睇怕連博摸和都有啲難。
歐聯D組