撐拜仁再炒羅馬提早出線

猪拉多纳

巴塞近期表現同成績認真麻麻，但前教練哥迪奧拿帶領嘅拜仁慕尼黑就順風順水，呢支德甲班霸今晚喺E組只要主場殺敗意甲羅馬便可提早出線，一於熱捧讓球主勝。

（有線62及202台周四凌晨3時45分直播）

拜仁目前喺E組3戰全勝，分別領先羅馬5分及曼城7分，只要今場贏波便可穩奪小組首名資格，上次作客羅馬佢哋以狂風掃落姿態大炒七個一皮，有意大利傳媒報道，羅馬為咗減少失球，今場有可能棄用隊長托迪專心打防守，但以拜仁強大火力，羅馬想死守亦都唔易。特別留意法國翼鋒列貝利已經傷愈可披甲，上場聯賽對多蒙特就係靠佢後備落場，將戰局扭轉反敗為勝，配合埋洛賓、羅拔利雲度杜夫斯基、湯馬士梅拿及馬里奧葛斯，呢條鋒線順起上嚟真係得人驚。
小豬報喜11•22復出

拜仁賽前仲收到好消息，養傷超過兩個月嘅中場「小豬」舒韋恩史迪加已接近康復，有機會喺本月22日主場迎戰賀芬咸嘅聯賽中復出，據消息透露「小豬」已經私底下買咗好多嗰場比賽嘅VIP門票，相信佢係準備安排一眾親朋戚友捧自己場。