死亡E組 出線睇今鋪

猪拉多纳

歐聯分組賽進入第4輪，死亡E組嘅出線席位已經有啲眉目，拜仁今晚只要砌低羅馬就肯定晉級，正路嚟講，「雌狼」應該會全心死守求1分，等最尾一輪鬥曼城決生死；另邊廂嘅「藍月亮」要保住一線生機，今鋪鬥中央陸軍則非勝不可，好睇過戲！
曼城食住個勢打殘陸軍

歐聯E組另一場戲碼，由曼城主場火併莫斯科中央陸軍，兩軍喺分組賽都未開齋，為保出線機會今戰同樣非勝不可。雖然決心差唔多，不過人腳曼城就贏成條街，要大炒贏波冇難度，1.7倍「讓主」抵捧！

（有線61及201周四凌晨3:45直播）
林柏特續約至季尾

曼城之前歐聯主場鬥羅馬坐唔爆，球會即時見招拆招，今仗波飛買一送一吸引擁躉撐場，英媒話銷情極之理想，今晚勢必爆棚，而且中央陸軍球迷繼續被禁入場睇波，淨係聲勢都輸晒。咪忘記曼城日前喺「曼市打吡」擊敗曼聯，除咗中場猛將拿斯尼傷愈復出，後衞薩巴列達更豪言呢場勝仗令佢哋重拾信心，唔單止咁，傷愈嘅借將林柏特仲落實續約至季尾，家陣成班波士氣如虹，勒都勒唔住啦！

莫斯科中央陸軍雖然有中場迪沙高耶夫同華尼保坐完波監，弊在箭頭彭真高膝傷唔踢得，另一射手杜姆比亞腳踝傷勢又未完全康復，鋒力靠唔住，今晚想破蛋都難啦！