德甲當旺歐霸要追

猪拉多纳

德甲踢咗四份一，列強都已經上力，呢個聯賽近年進步明顯，近期喺歐洲兩大盃賽持續強勢，上輪六支球隊分別喺歐聯及歐霸盃取得全勝，今輪至截稿前，利華古遜同多蒙特亦雙雙喺歐聯報捷，順到不得了，尤其利華作客擊敗俄羅斯富豪球會辛尼特最振奮。今晚歐霸輪到慕遜加柏同禾夫斯堡登場，喺Alwin眼中，兩軍無論聯賽排名同狀態尤在利華之上，面對實力次一皮球隊可以延續德甲強勢，推介乘埋有1.88倍嘅單Ｗ過關2串1。
慕遜加柏禾堡都弗爆

先講Ａ組慕遜加柏作客塞浦路斯對阿波羅利馬素（周五凌晨2時開賽），慕遜加柏啱啱喺德甲以3比1打破賀芬咸今季不敗身，本身保持今季三線作戰17場不敗，教練法夫爾亦度過咗佢嘅57歲快樂生辰，睇番對賀芬咸一戰水準甚高，賀芬咸表現亦好出色，但喺慕遜加柏面前輸得心服口服。

慕遜加柏現時三線實力平均，行軍速度奇高，狀態同士氣都處於高峰，佢哋兩周前主場對阿波羅利馬素輕輕鬆鬆大炒對手5蛋，搞到對手要換帥，雖然之後喺聯賽兩勝弱旅，但呢支塞浦路斯球隊實力及經驗無法同慕遜加柏相提並論，今晚法夫爾帶領嘅慕遜加柏作客應可輕鬆再贏。

至於Ｈ組禾夫斯堡主場迎戰俄超卡斯洛達（周五凌晨4時05分開賽），禾堡狀態尤在慕遜加柏之上，近期德甲豪取五連勝殺上次席，德甲盃同歐霸盃都強勢挺進，球隊固然有財團大眾汽車支持，體育總監K阿羅夫斯同教練赫基嘅緊密合作亦幫助球隊重返高峰，佢哋唔會因球會有錢亂買人，只就個別有需要位置買入適當球員。

禾夫斯堡今季人腳變化唔大，但每個位置都好平均，而且兵源充裕，踢法亦實而不華，由於歐霸個頭開得唔靚，首仗即大敗於愛華頓腳下，今晚主場出擊求勝意欲極強；客軍卡斯洛達近季雖然進步神速，但嚟到歐霸無論級數同經驗都差一皮，兩周前主場面對禾堡都輸2比4，今場作客更加冇得揮。

Alwin

Hoffenheim CL Winner

國籍：德國

自小是史浩克擁躉，居於辛斯海姆，即賀芬咸大本營，對兩軍有深入資訊，除撰寫球評外，亦在個人博客hoffeclwinner.blogabet.com 提供免費足球推介。