射手弗到爆！拿玻里炒起年青人

猪拉多纳

歐霸盃其中一場矚目戲碼，由I組嘅拿玻里主場恭候瑞士勁旅年青人。拿玻里上場砌低羅馬士氣大振，加上一對射手Fit到漏，對住作客容易腳仔軟嘅年青人肯定殺無赦，1.85倍「讓主」係心水之選。

（有線64及203周五凌晨4:05直播）

拿玻里原先攞到今屆歐聯資格，可惜佢哋喺附加賽中被畢爾包淘汰，結果降格踢歐霸盃。雖然歐霸盃重要性比唔上歐聯，但唔代表球隊無要求，相信殺入淘汰賽階段係佢哋最低要求。況且主帥賓尼迪斯素有「盃賽專家」之稱，邊可以咁失威出唔到線先？
希古恩入波頻頻

形勢上，拿玻里、年青人同布拉格斯巴達同得6分，出線席位基本上係3揀2。既然拿軍今仗坐擁主場之利，當然唔可以放過呢個搶分良機。佢哋喺上仗主場以2:0打敗聯賽次席羅馬後，成功為球隊打下強心針，難怪主將咸錫賽前信心十足，指班波要乘勝追擊。而且隊友希古恩連續3場建功，配合主場零舍醒神、連續4場主場「士哥」嘅前鋒荷西卡利祖攻堅，的確夠料炒起年青人，就算守將辛尼加休戰都唔使驚。

對手年青人喺I組取得2勝1負成績，但係呢6分全部都喺主場攞到，唯一一場作客布拉格斯巴達就輸1:3。再睇番呢支瑞士球隊最近5場作客賽事，足足輸咗4場波，擺明唔識作客踢好波，今仗遠征意大利相信都幾難全身而退。

歐霸盃I組