微北部打吡 孖堡合演入球騷

猪拉多纳

德甲早場上演禾夫斯堡主場對漢堡嘅「微北部打吡」，點解係「微」？皆因北部打吡焦點一向係漢堡同雲達不來梅呢對死敵，「孖堡」對決牙骹味差咗一截，但係今場兩軍近況都好，賽前亦揚言踢進攻足球，黑柴簡簡單單吼大盤。

（有線61及64台周日晚10時30分直播）

禾夫斯堡近來三線作戰已保持7連勝，近5仗合共入咗20球，前線弗到爆燈，雖然三日前啱啱踢完歐霸盃，但球隊中前場人腳充裕，主力箭頭奧歷同天才中場麥斯美艾洛特喺歐霸盃輪休，中場大將肯特同比列錫都只係各踢半場，呢四位攻擊手都儲備足夠體力喺今仗攻堅，主場出擊火力有保證。
禾堡冇左閘 漢堡擺大頭

不過，禾堡後衞就冇得抖，右閘施巴施坦真格、中堅拿杜同羅賓洛治都要踢足，未必回到氣，左閘更加冇人用，正選列卡度洛迪古斯仲養緊傷，取代佢嘅馬素舒希化又喺歐霸盃中招，未踢完半場已傷出，今仗唔使預佢，焗住由高大中堅添姆高路斯客串，佢今季上陣機會唔多，德國盃對海登咸更表現出醜，踢咗半場即被換走，加上位置唔慣，今晚面對漢堡踢法靈活嘅右翼尼古拉梅拿，隨時成為禾堡防線缺口。

漢堡今季入波少，主因係新兵多同季初鬧將帥不和影響士氣，近期於新帥辛巴亞領導下已逐漸重上正軌，上仗殺敗勁旅利華古遜士氣大振，中場靈魂雲達華治打破314日入球荒，信心返晒嚟，箭頭拉蘇加、翼鋒尼古拉梅拿同進攻中場賀治比既有質素，狀態亦循序漸進。漢堡喺今場打吡戰被睇低一線，但辛巴亞認為反而冇包袱，決定擺大個頭，踢少一個防守中場，採「四一四一」陣式同禾堡駁火，入波預期唔會少。