巴西尖刀狠插土耳其

猪拉多纳

3新星薩氣騰騰博上位

巴西自世盃後由鄧加重掌帥印，4戰全勝重現霸氣，「森巴兵團」今晚於國際熱身賽作客土耳其，鄧加召入近期喺歐聯光芒四射嘅「薩克達三子」雷斯阿祖安奴、杜格拉斯哥斯達同費特洛迪古斯，銳意為王牌射手尼馬重組鋒線支援組合，以提升火力。三位新丁難得披上黃金戰衣，勢必使出渾身解數數胡，爭奪國家隊位置。土耳其有歐國盃外圍賽後顧，唔敢去盡，情況更危，直取巴西讓球客勝。

（TVB301周四凌晨2時30分直播）
為9號位搵繼承人

鄧加已成功改善巴西後防，佢領軍下4戰都冇失波，依家係時候針對攻力問題。球隊鋒線近年靠晒尼馬孭飛，並唔健康。鄧加今次大幅轉換中前場人腳，雷斯阿祖安奴、杜格拉斯哥斯達、費特洛迪古斯，加埋賀芬咸中場羅拔圖法明奴都係從未為大國腳上陣嘅新丁。4人同樣今季表現大勇，雷斯阿祖安奴喺歐聯兩戰巴迪，獨取8球，成為首位連續兩場歐聯帽子戲法嘅球員，勁過美斯同C朗。巴西近年缺乏一位把握力強嘅正中鋒，雷斯阿祖安奴正好填補呢個「9號位」嘅空缺。

杜格拉斯哥斯達及費特洛迪古斯皆擅於盤扭及傳送，可提升巴西中場活力，兩人同雷斯阿祖安奴夾慣夾熟，若然一齊上陣，可將薩克達強大火力注入「森巴兵團」。另23歲嘅羅拔圖法明奴喺德甲亦好搶眼，上仗鬥科隆更梅開二度。另巴黎聖日耳門快翼盧卡斯洛迪古斯獲重召，當然仲有尼馬，巴西進攻人腳相當鼎盛，絕對唔赦土耳其。
土國實力差兩班

另一邊廂，土耳其近年人才凋零，球隊青黃不接，仲要靠老將咸美艾天托普主持大局，最有睇頭只有馬體會中場阿達杜倫，人腳同巴西差兩班波。土國近年國際賽成績乏善可陳，對上一次進身大賽決賽周已經係08年歐國盃。佢哋喺今屆歐國盃外圍賽3戰得1分，排緊小組包尾，下周一凌晨主場鬥哈薩克不容再失。因此，今場熱身賽土軍只會點到即止，以免浪費體力，甚至造成無謂受傷，壞咗大事。