泰維斯回歸阿根廷穩勝格

猪拉多纳

南美另一勁旅阿根廷喺英國倫敦鬥克羅地亞，焦點將會落喺闊別國家隊3年嘅阿根廷前鋒「野獸」泰維斯身上，今次佢會同美斯、阿古路及希古恩組成星級鋒線，預計可擊敗有歐國盃大戰跟尾嘅格仔兵團，1.7倍讓球主勝熱得有道理。

（周四凌晨3時45分開賽）

阿根廷今次國際賽檔期會喺英國出戰兩支歐洲球隊克羅地亞及葡萄牙，領隊馬天奴放棄徵召國內球員，除門將拿侯爾古斯文効力墨超堤格雷外，其餘24人全部喺歐洲搵食。而今次最受矚目肯定係祖雲達斯前鋒泰維斯回歸。「泰仔」由於同上任領隊沙貝拉唔咬弦，最近一次入選已經要數番到2011年。隨住沙貝拉離任，唔少聲音都認為應該重召番佢。

泰維斯當年踏足歐洲球壇，首間加盟球會就係英超韋斯咸，今次比賽場地正正就係「錘仔幫」主場烏普頓公園，跟住佢仲會重返佢另一前東家曼聯主場奧脫福鬥葡萄牙，重返呢兩笪英倫福地比賽，當然特別醒神，並希望助國家隊贏波以證明自己。
克羅地亞擺明留力

克羅地亞今次點兵亦精銳盡出，西甲三雄皇馬中場莫迪歷、巴塞中場拿傑迪錫同馬體會箭頭文迪蘇傑等主力都有入選，不過嚟緊周一凌晨佢哋會喺歐國盃外圍賽作客強敵意大利，明眼人都知呢場先係主菜，所以佢哋今仗肯定會留一手，避免踢殘或增添無謂傷兵，輸波亦無所謂，因此阿根廷讓波仍然捧得過。