烏圭三叉戟玩殘哥軍

猪拉多纳

阿蘇壓陣打復仇戰

雖然今日賽事唔多，但唔代表冇好嘢推介畀大家，阿King就睇中聽朝場熱身賽烏拉圭主場出戰哥斯達黎加，前者「咬人蘇」蘇亞雷斯復出後逐漸上力，同卡雲尼及艾保靴南迪斯組成嘅三叉戟火力唔嘢小，適逢哥斯達黎加近期唔識死玩搶攻，隨時畀烏軍炒鑊甘，2.2倍讓球主勝不容錯過。

（周五早上7時開賽）

講到烏拉圭，點可以唔提王牌蘇亞雷斯，儘管佢嘅國際賽禁令未滿，但就可以踢熱身賽，呢位因世盃期間咬人而被罰停賽嘅巴塞射手，自10月尾球會賽事刑滿復出後雖然仲未開齋，不過近期頻頻送上助攻，睇得出狀態不斷冒升，卡雲尼更加弗到漏油，喺聖日耳門趁大佬伊巴謙莫域受傷獨擔大旗，近六場入咗五粒，至於今季轉投侯城嘅艾保靴南迪斯極速融入英超，呢把三叉戟集頭槌、技術、速度等元素堅全面。

哥斯達黎加於世盃期間靠穩健防守歷史性入8強贏盡掌聲，但世盃後改由名宿雲祖柏當看守領隊，班波忽然轉踢性感足球，好似上月搵亞洲二線隊阿曼拍跳險勝4比3，好睇就好睇喇，但令防線備受壓力，同烏拉圭搶攻盞死多兩錢重。況且世盃分組賽首仗烏拉圭畀哥斯達黎加反勝3比1，佢哋梗係想一雪前恥，主W冇咩分頭，直取讓球主勝好過。
「阿甲兵工廠」主場醒神

至於阿甲沙蘭迪兵工廠主場對獨立隊，前者雖有中場費迪歷高費利仍因傷上陣成疑，但佢哋喺自己地頭出擊分外醒神，近七主場不敗兼贏咗五場，絕對唔赦獨立隊。最後智利盃8強首回合奧達斯主場對柏利斯天奴，奧達斯箭頭迪亞高華利祖斯上圈兩黃一紅被逐要停賽，相反柏利斯天奴首席射手李安度華倫西亞可候命殺敵，挾住兩連勝氣勢仲有得受讓咁筍，讓球客勝捧得過。