烏拉圭 哥斯達黎加攜手做細界

猪拉多纳

足智彩繼續有熱身賽玩，烏拉圭聽朝主場對哥斯達黎加，可以試下玩1.85倍入球細。雖然蘇亞雷斯已經全面復出，但烏拉圭喺世盃後始終撻唔着，加上哥斯達黎加門將基羅拿華斯要爭取表現，避免喺皇家馬德里長坐冷板，相信唔慌多波入！

（開賽時間：周五早上7:00）
主隊換血玩試陣

烏拉圭上個月喺熱身賽以3:0砌低阿曼，蘇亞雷斯梅開二度的確係醒，但大家唔好忘記，其實烏拉圭下半場已經瘋狂換人試陣，加上前鋒科蘭淡出冇歸隊，就算射手卡雲尼重新入選，淨係靠佢同王牌蘇亞雷斯，真係未必炒得起對手，始終佢哋踢足全場嘅機會，真係好細囉！

仲有呀，烏拉圭喺世盃後處於換血期，之前喺熱身賽對日本、南韓同沙特阿拉伯都係開入球細，證明要時間重新建立進攻體系，唔習慣壓住對手狂攻，既然哥斯達黎加打法上鍾意歎慢板控球在腳，今場真係唔似會出現對攻場面。

另一方面，哥斯達黎加喺世盃後由雲祖柏擔任看守教練，由於佢未坐正，所以賽前好大聲話，絕對唔會驚烏拉圭。

事實上，今次哥斯達黎加都幾齊腳，而且門將基羅拿華斯加盟皇馬後，只能夠踢西班牙盃，為咗證明實力，今次對住巴塞嘅「蘇神」，佢肯定唔想衰，有機會打身價波帶挈大家收錢。