羅拔仔孭重飛 波蘭夠贏格魯吉亞

猪拉多纳

D組波蘭作客鬥格魯吉亞，雖然格魯吉亞只係此組次級魚腩，但「神鋒隊長」羅拔利雲度夫斯基仍要領軍全力爭勝，事關波蘭雖係贏過同組出線大熱德國，不過依家同愛爾蘭、蘇格蘭相比優勢並唔明顯，面對格魯吉亞都冇失分空間，波蘭小讓平半，捧上盤。

（有線61及201台周六凌晨1時直播）
形勢混亂 寸土必爭

德國原本被視為D組出線大熱門，不過卻先後失分畀波蘭及愛爾蘭，搞到形勢七國咁亂，現時波蘭、愛爾蘭同得七分，德國及蘇格蘭以四分緊隨其後，格魯吉亞雖有三分在手，但其實只係贏過極級魚腩直布羅陀，陣中只有意甲安玻里前鋒麥希里迪斯較具威脅，講實力仲未夠班威脅其他球隊。波蘭今次有中場巴拉斯塞高斯基、基列治及波蘭斯基因傷未有入選，羅拔利雲度夫斯基嘅擔子更重，呢名拜仁射手今季喺德甲已入五球，今屆外圍賽對直布羅陀亦食出大四喜，腳風唔錯，有力帶領波蘭全取三分，上盤讓平半值得捧場。