希帥生死戰荷蘭大解脫

猪拉多纳

希丁克生死戰玩「大」佢！歐國外A組應屆世盃季軍荷蘭於主場迎戰拉脫維亞，由於「橙衣軍團」自神奇教頭希丁克接手後戰績不佳，備受壓力，呢位老帥揚言如果今仗再輸就會引咎辭職，對住弱旅拉脫維亞仲唔擺大個頭狂攻搶W咩，但佢哋防線唔多穩陣，讓球主客和要讓到兩球隨時輸盤，倒不如改玩中位數調至3.5球嘅入球大。

（有線61及201台周一凌晨1時直播）

以往帶領南韓及澳洲曾締造奇迹嘅希丁克，近年執教土耳其及安治成績麻麻，已經有江郎才盡嘅感覺，因此今次獲邀重掌荷蘭唔多被人睇好，果然，呢支世盃季軍喺希帥帶隊踢咗五場波，竟然輸咗四場，尤以上月歐國外作客淨吞冰島兩蛋最羞家。堂堂一代名帥，係咁畀人話過晒氣，呢啖氣點都吞唔落，希丁克更立下軍令狀，話如果今仗對拉脫維亞再輸嘅話，佢老人家就引咎辭職，玩到咁大睇得出佢嘅決心。
拉脫維亞隨時入到波

事實上，荷蘭鋒線人才濟濟，亨特拉爾、洛賓、迪比、阿費利都弗，日前熱身賽對墨西哥仲特登收起隊長尹佩斯，今仗定必火力全開，唔係人咁品。但好衰唔衰，希帥拆散世盃期間大獲好評嘅三後衞陣式，改踢四人防線令迪維積、華亞爾等守將唔多適應，加上中場悍將尼祖迪莊因傷退隊，冇咗呢位硬朗防中做掃蕩，令原本不穩嘅防線更加危危乎，面對反擊唔曳嘅拉脫維亞，未必保得住清白之身。斯維相信荷蘭贏波冇問題，不過讓球主客和要讓到兩球實在太多，既然佢哋攻強守弱，寧願轉玩中位數調至3.5球嘅大盤。

至於同組榜首大戰捷克主場對冰島，兩軍均屬全勝之師，不過捷克有喺英超打滾多年嘅老大哥施治及路斯基壓陣，經驗遠勝對手，況且冰島喺主場就也文也武，近七作客贏得一場咁大把，捷克主W有1.58倍咪嫌少。

（有線64及203台周一凌晨3時45分直播）